kasrat-e-dagh se dil rashk-e-gulistan na hua

kasrat-e-dāġh se dil rashk-e-gulistāñ na huā

merā dil ḳhvāh jo kuchh thā vo kabhū yaañ na huā

jī to aise ka.ī sadqe kiye tujh par lekin

haif ye hai ki tanik tū bhī pashemāñ na huā

aah meñ kab kī ki sarmāya-e-dozaḳh na huī

kaun sā ashk mirā mamba-e-tūfāñ na huā

go tavajjoh se zamāne kī jahāñ meñ mujh ko

jāh-o-sarvat kā mayassar sar-o-sāmāñ na huā

shukr-sad-shukr ki maiñ zillat-o-ḳhvārī ke sabab

kisī unvān meñ ham-chashm-e-azīzāñ na huā

barq mat ḳhoshe kī aur apnī bayāñ kar sohbat

shukr kar ye ki mirā vaañ dil-e-sozāñ na huā

dil-e-be-rahm gayā shaiḳh liye zer-e-zamīñ

mar gayā par ye kuhan gabr-musalmāñ na huā

kaun sī raat zamāne meñ ga.ī jis meñ 'mīr'

sīna-e-chāk se maiñ dast-o-garebāñ na huā

kasrat-e-dagh se dil rashk-e-gulistan na hua

mera dil KHwah jo kuchh tha wo kabhu yan na hua

ji to aise kai sadqe kiye tujh par lekin

haif ye hai ki tanik tu bhi pasheman na hua

aah mein kab ki ki sarmaya-e-dozaKH na hui

kaun sa ashk mera mamba-e-tufan na hua

go tawajjoh se zamane ki jahan mein mujh ko

jah-o-sarwat ka mayassar sar-o-saman na hua

shukr-sad-shukr ki main zillat-o-KHwari ke sabab

kisi unwan mein ham-chashm-e-azizan na hua

barq mat KHoshe ki aur apni bayan kar sohbat

shukr kar ye ki mera wan dil-e-sozan na hua

dil-e-be-rahm gaya shaiKH liye zer-e-zamin

mar gaya par ye kuhan gabr-musalman na hua

kaun si raat zamane mein gai jis mein 'mir'

sina-e-chaak se main dast-o-gareban na hua