qabu KHizan se zoaf ka gulshan main ban gaya

qaabū ḳhizāñ se zo.af kā gulshan maiñ ban gayā

dosh-e-havā pe rañg-e-gul-o-yāsaman gayā

bargashta-baḳht dekh ki qāsid safar se maiñ

bhejā thā us ke paas so mere vatan gayā

ḳhātir-nishāñ ai said-fagan hogī kab tirī

tīroñ ke maare merā kaleja to chhan gayā

yādash-ba-ḳhair dasht meñ mānind-e-ankabūt

dāman ke apne taar jo ḳhāroñ pe tan gayā

maarā thā kis libās meñ uryānī ne mujhe

jis se tah-e-zamīn bhī maiñ be-kafan gayā

aa.ī agar bahār to ab ham ko kyā sabā

ham se to āshiyāñ bhī gayā aur chaman gayā

sarsabz mulk-e-hind meñ aisā huā ki 'mīr'

ye reḳhta likhā huā terā dakan gayā

qabu KHizan se zoaf ka gulshan main ban gaya

dosh-e-hawa pe rang-e-gul-o-yasaman gaya

bargashta-baKHt dekh ki qasid safar se main

bheja tha us ke pas so mere watan gaya

KHatir-nishan ai said-fagan hogi kab teri

tiron ke mare mera kaleja to chhan gaya

yaadash-ba-KHair dasht mein manind-e-ankabut

daman ke apne tar jo KHaron pe tan gaya

mara tha kis libas mein uryani ne mujhe

jis se tah-e-zamin bhi main be-kafan gaya

aai agar bahaar to ab hum ko kya saba

hum se to aashiyan bhi gaya aur chaman gaya

sarsabz mulk-e-hind mein aisa hua ki 'mir'

ye reKHta likha hua tera dakan gaya