kis sham se uTha tha mere dil mein dard sa

kis shaam se uThā thā mire dil meñ dard sā

so ho chalā huuñ peshtar-az-sub.h sard sā

baiThā huuñ juuñ ġhubār-e-za.īf ab vagarna meñ

phirtā rahā huuñ galiyoñ meñ āvāra-gard sā

qasd-e-tarīq-e-ishq kiyā sab ne ba.ad-e-qais

lekin huā na ek bhī us rah-navard sā

hāzir yarāq-e-be-mazgī kis ghaḌī nahīñ

ma.ashūq kuchh hamārā hai āshiq-nabard sā

kyā 'mīr' hai yahī jo tire dar pe thā khaḌā

namnāk-chashm-o-ḳhushk-lab o rañg zard sā

kis sham se uTha tha mere dil mein dard sa

so ho chala hun peshtar-az-subh sard sa

baiTha hun jun ghubar-e-zaif ab wagarna mein

phirta raha hun galiyon mein aawara-gard sa

qasd-e-tariq-e-ishq kiya sab ne baad-e-qais

lekin hua na ek bhi us rah-naward sa

hazir yaraq-e-be-mazgi kis ghaDi nahin

mashuq kuchh hamara hai aashiq-nabard sa

kya 'mir' hai yahi jo tere dar pe tha khaDa

namnak-chashm-o-KHushk-lab o rang zard sa