aah-e-sahar ne sozish-e-dil ko miTa diya

āh-e-sahar ne sozish-e-dil ko miTā diyā

us baav ne hameñ to diyā sā bujhā diyā

samjhī na bād-e-sub.h ki aa kar uThā diyā

is fitna-e-zamāna ko nāhaq jagā diyā

poshīda rāz-e-'ishq chalā jaa.e thā sau aaj

be-tāqatī ne dil kī vo parda uThā diyā

us mauj-ḳhez dahr meñ ham ko qazā ne aah

paanī ke bulbule kī tarah se miTā diyā

thī laag us kī teġh ko ham se sau 'ishq ne

donoñ ko mā'rke meñ gale se milā diyā

sab shor-e-mā-o-man ko liye sar meñ mar ga.e

yāroñ ko is fasāne ne āḳhir sulā diyā

āvārgān-e-ishq kā pūchhā jo maiñ nishāñ

musht-e-ġhubār le ke sabā ne uḌā diyā

ajzā badan ke jitne the paanī ho bah ga.e

āḳhir gudāz 'ishq ne ham ko bahā diyā

kyā kuchh na thā azal meñ na taalā jo the durust

ham ko dil-e-shikasta qazā ne dilā diyā

goyā muhāsba mujhe denā thā 'ishq kā

us taur dil sī chiiz ko maiñ ne lagā diyā

muddat rahegī yaad tire chehre kī jhalak

jalve ko jis ne maah ke jī se bhulā diyā

ham ne to sādgī se kiyā jī kā bhī ziyāñ

dil jo diyā thā so to diyā sar judā diyā

boī kabāb soḳhta aa.ī dimāġh meñ

shāyad jigar bhī ātish-e-ġham ne jilā diyā

taklīf dard-e-dil kī 'abas ham-nashīñ ne kī

dard-e-suḳhan ne mere sabhoñ ko rulā diyā

un ne to teġh khīñchī thī par jī chalā ke 'mīr'

ham ne bhī ek dam meñ tamāshā dikhā diyā

aah-e-sahar ne sozish-e-dil ko miTa diya

us baw ne hamein to diya sa bujha diya

samjhi na baad-e-subh ki aa kar uTha diya

is fitna-e-zamana ko nahaq jaga diya

poshida raaz-e-'ishq chala jae tha sau aaj

be-taqati ne dil ki wo parda uTha diya

us mauj-KHez dahr mein hum ko qaza ne aah

pani ke bulbule ki tarah se miTa diya

thi lag us ki tegh ko hum se sau 'ishq ne

donon ko ma'rke mein gale se mila diya

sab shor-e-ma-o-man ko liye sar mein mar gae

yaron ko is fasane ne aaKHir sula diya

aawargan-e-ishq ka puchha jo main nishan

musht-e-ghubar le ke saba ne uDa diya

ajza badan ke jitne the pani ho bah gae

aaKHir gudaz 'ishq ne hum ko baha diya

kya kuchh na tha azal mein na tala jo the durust

hum ko dil-e-shikasta qaza ne dila diya

goya muhasba mujhe dena tha 'ishq ka

us taur dil si chiz ko main ne laga diya

muddat rahegi yaad tere chehre ki jhalak

jalwe ko jis ne mah ke ji se bhula diya

hum ne to sadgi se kiya ji ka bhi ziyan

dil jo diya tha so to diya sar juda diya

boi kabab soKHta aai dimagh mein

shayad jigar bhi aatish-e-gham ne jila diya

taklif dard-e-dil ki 'abas ham-nashin ne ki

dard-e-suKHan ne mere sabhon ko rula diya

un ne to tegh khinchi thi par ji chala ke 'mir'

hum ne bhi ek dam mein tamasha dikha diya