aae hain mir munh ko banae KHafa se aaj

aa.e haiñ 'mīr' muñh ko banā.e ḳhafā se aaj

shāyad bigaḌ ga.ī hai kuchh us bevafā se aaj

vāshud huī na dil ko faqīroñ ke bhī mile

khultī nahīñ girah ye kasū kī duā se aaj

jiine meñ iḳhtiyār nahīñ varna ham-nashīñ

ham chāhte haiñ maut to apnī ḳhudā se aaj

saaqī Tuk ek mausam-e-gul kī taraf bhī dekh

Tapkā paḌe hai rañg chaman meñ havā se aaj

thā jī meñ us se miliye to kyā kyā na kahiye 'mīr'

par kuchh kahā gayā na ġham-e-dil hayā se aaj

aae hain 'mir' munh ko banae KHafa se aaj

shayad bigaD gai hai kuchh us bewafa se aaj

washud hui na dil ko faqiron ke bhi mile

khulti nahin girah ye kasu ki dua se aaj

jine mein iKHtiyar nahin warna ham-nashin

hum chahte hain maut to apni KHuda se aaj

saqi Tuk ek mausam-e-gul ki taraf bhi dekh

Tapka paDe hai rang chaman mein hawa se aaj

tha ji mein us se miliye to kya kya na kahiye 'mir'

par kuchh kaha gaya na gham-e-dil haya se aaj