aawegi meri qabr se aawaz mere baad

āvegī merī qabr se āvāz mere ba.ad

ubhreñge ishq-e-dil se tire raaz mere ba.ad

jiinā mirā to tujh ko ġhanīmat hai nā-samajh

khīñgā kaun phir ye tire naaz mere ba.ad

sham-e-mazār aur ye soz-e-jigar mirā

har shab kareñge zindagī nā-sāz mere ba.ad

hasrat hai is ke dekhne kī dil meñ be-qayās

aġhlab ki merī āñkheñ raheñ baaz mere ba.ad

kartā huuñ maiñ jo naale sar-anjām baaġh meñ

muñh dekho phir kareñge ham āvāz mere ba.ad

bin gul muā hī maiñ to pa tū jā ke lauTiyo

sehn-e-chaman meñ ai par-e-parvāz mere ba.ad

baiThā huuñ 'mīr' marne ko apne meñ musta.id

paidā na hoñge mujh se bhī jāñbāz mere ba.ad

aawegi meri qabr se aawaz mere baad

ubhrenge ishq-e-dil se tere raaz mere baad

jina mera to tujh ko ghanimat hai na-samajh

khinga kaun phir ye tere naz mere baad

sham-e-mazar aur ye soz-e-jigar mera

har shab karenge zindagi na-saz mere baad

hasrat hai is ke dekhne ki dil mein be-qayas

aghlab ki meri aankhen rahen baz mere baad

karta hun main jo nale sar-anjam bagh mein

munh dekho phir karenge hum aawaz mere baad

bin gul mua hi main to pa tu ja ke lauTiyo

sehn-e-chaman mein ai par-e-parwaz mere baad

baiTha hun 'mir' marne ko apne mein mustaid

paida na honge mujh se bhi jaanbaz mere baad