hum bhi phirte hain yak hasham le kar

ham bhī phirte haiñ yak hasham le kar

dasta-e-dāġh-o-fauj-e-ġham le kar

dast-kash naala pesh-rau girya

aah chaltī hai yaañ ilm le kar

marg ik māñdgī kā vaqfa hai

ya.anī aage chaleñge dam le kar

us ke uupar ki dil se thā nazdīk

ġham-e-dūrī chale haiñ ham le kar

terī vaz-e-sitam se ai be-dard

ek aalam gayā alam le kar

bārhā said-gah se us kī ga.e

dāġh-e-yās āhu-e-haram le kar

zo.af yaañ tak khiñchā ki sūrat-gar

rah ga.e haath meñ qalam le kar

dil pe kab iktifā kare hai ishq

jā.egā jaan bhī ye ġham le kar

shauq agar hai yahī to ai qāsid

ham bhī aate haiñ ab raqam le kar

'mīr'-sāhib hī chūke a bad-ahd

varna denā thā dil qasam le kar

hum bhi phirte hain yak hasham le kar

dasta-e-dagh-o-fauj-e-gham le kar

dast-kash nala pesh-rau girya

aah chalti hai yan ilm le kar

marg ek mandgi ka waqfa hai

yani aage chalenge dam le kar

us ke upar ki dil se tha nazdik

gham-e-duri chale hain hum le kar

teri waz-e-sitam se ai be-dard

ek aalam gaya alam le kar

barha said-gah se us ki gae

dagh-e-yas aahu-e-haram le kar

zoaf yan tak khincha ki surat-gar

rah gae hath mein qalam le kar

dil pe kab iktifa kare hai ishq

jaega jaan bhi ye gham le kar

shauq agar hai yahi to ai qasid

hum bhi aate hain ab raqam le kar

'mir'-sahib hi chuke a bad-ahd

warna dena tha dil qasam le kar