sair kar andalib ka ahwal

sair kar andalīb kā ahvāl

haiñ pareshāñ chaman meñ kuchh par-o-bāl

tab-e-ġham to ga.ī tabīb vale

phir na aayā kabhū mizāj-e-bahāl

sabza-nau-rasta rahguzār kā huuñ

sar uThāyā ki ho gayā pāmāl

kyuuñ na dekhūñ chaman ko hasrat se

āshiyāñ thā mirā bhī yaañ par-sāl

sard-mehrī kī bas-ki gul-rū ne

oḌhī abr-e-bahār ne bhī shaal

hijr kī shab ko yaañ ta.iiñ taḌpā

ki huā sub.h hote merā visāl

ham to sah guzre kaj-ravī terī

na nibhe par ai falak ye chaal

dīda-e-tar pe shab rakhā thā 'mīr'

lukka-e-abr hai mirā rūmāl

sair kar andalib ka ahwal

hain pareshan chaman mein kuchh par-o-baal

tab-e-gham to gai tabib wale

phir na aaya kabhu mizaj-e-bahaal

sabza-nau-rasta rahguzar ka hun

sar uThaya ki ho gaya pamal

kyun na dekhun chaman ko hasrat se

aashiyan tha mera bhi yan par-sal

sard-mehri ki bas-ki gul-ru ne

oDhi abr-e-bahaar ne bhi shaal

hijr ki shab ko yan tain taDpa

ki hua subh hote mera visal

hum to sah guzre kaj-rawi teri

na nibhe par ai falak ye chaal

dida-e-tar pe shab rakha tha 'mir'

lukka-e-abr hai mera rumal