mera guman hai shayad ye waqia ho jae

mirā gumān hai shāyad ye vāqi.a ho jaa.e

ki shaam mujh meñ Dhale aur sab fanā ho jaa.e

ho baat us se kuchh aise ki vaqt sākit ho

kalām apnā takallum se māvarā ho jaa.e

bachā ke aañkh maiñ ḳhud apnī khoj meñ niklūñ

mire vajūd meñ ek chor rāsta ho jaa.e

kuchh is tarah vo nigāh-e-ḳhayāl meñ utre

ki us ke aage jhukūñ aur vo ḳhudā ho jaa.e

atā ho chashm-e-tamannā ko vo qarīna-e-dīd

ki shauq dast-e-taqāzā se mā-sivā huā jaa.e

rahe ye tishna-labī dasht-e-shauq meñ qaa.em

vo intihā.eñ mileñ merī ibtidā ho jaa.e

nasīb ho kabhī aisī bhī ik sahar 'āsim'

ki shām-e-hijr kī furqat kā sāneha ho jaa.e

mera guman hai shayad ye waqia ho jae

ki sham mujh mein Dhale aur sab fana ho jae

ho baat us se kuchh aise ki waqt sakit ho

kalam apna takallum se mawara ho jae

bacha ke aankh main KHud apni khoj mein niklun

mere wajud mein ek chor rasta ho jae

kuchh is tarah wo nigah-e-KHayal mein utre

ki us ke aage jhukun aur wo KHuda ho jae

ata ho chashm-e-tamanna ko wo qarina-e-did

ki shauq dast-e-taqaza se ma-siwa hua jae

rahe ye tishna-labi dasht-e-shauq mein qaem

wo intihaen milen meri ibtida ho jae

nasib ho kabhi aisi bhi ek sahar 'asim'

ki sham-e-hijr ki furqat ka saneha ho jae