mere atraf ye kaisi sadaen raqs karti hain

mire atrāf ye kaisī sadā.eñ raqs kartī haiñ

ki yuuñ lagtā hai mujh meñ apsarā.eñ raqs kartī haiñ

isī ummīd par shāyad kabhī ḳhushbū koī utre

mirī yādoñ ke āñgan meñ havā.eñ raqs kartī haiñ

mayassar hī nahīñ aatī mujhe ik pal bhī tanhā.ī

ki mujh meñ ḳhvāhishoñ kī ḳhādmā.eñ raqs kartī haiñ

mujhe har shaam ik sunsān jañgal khīñch letā hai

aur is ke ba.ad phir ḳhūnī balā.eñ raqs kartī haiñ

kabhī dekhā hai tum ne shaam kā manzar jab āñkhoñ meñ

sitāre TūTte haiñ aur ghaTā.eñ raqs kartī haiñ

kisī kī chaah meñ koī 'ravish' jab jaan detā hai

zamīñ se āsmāñ tak ātmā.eñ raqs kartī haiñ

mere atraf ye kaisi sadaen raqs karti hain

ki yun lagta hai mujh mein apsaraen raqs karti hain

isi ummid par shayad kabhi KHushbu koi utre

meri yaadon ke aangan mein hawaen raqs karti hain

mayassar hi nahin aati mujhe ek pal bhi tanhai

ki mujh mein KHwahishon ki KHadmaen raqs karti hain

mujhe har sham ek sunsan jangal khinch leta hai

aur is ke baad phir KHuni balaen raqs karti hain

kabhi dekha hai tum ne sham ka manzar jab aankhon mein

sitare TuTte hain aur ghaTaen raqs karti hain

kisi ki chah mein koi 'rawish' jab jaan deta hai

zamin se aasman tak aatmaen raqs karti hain