mere badan mein lahu ka kaTaw aisa tha

mire badan meñ lahū kā kaTāv aisā thā

ki merā har-bun-e-mū ek ghaav aisā thā

bichhaḌte vaqt ajab uljhanoñ meñ Daal gayā

vo ek shaḳhs ki sīdhe subhāv aisā thā

chalī jo baat koī raat ke ta.āqub meñ

to baat baat se niklī bahāv aisā thā

maiñ puurā puurā ravāna thā abjadoñ kī taraf

hisāb-e-umr tirā chal-chalāv aisā thā

gul-e-nashāt kī ḳhushbū bhī baar thī mujh ko

mire mizāj meñ ġham kā rachāv aisā thā

kanār-e-lab meñ na rahtī thī mauj-e-goyā.ī

tabī.atoñ meñ suḳhan kā bahāv aisā thā

Thahartā kyā mirī ḳhākistarī nigāhoñ meñ

tirā vajūd to raushan alaav aisā thā

nikal sakī na koī bhī farār kī sūrat

sipāh-e-zīst kā mujh par paḌāv aisā thā

na chaah kar bhī use dil se chāhte the ham

kisī kī laag meñ 'tābish' lagāv aisā thā

mere badan mein lahu ka kaTaw aisa tha

ki mera har-bun-e-mu ek ghaw aisa tha

bichhaDte waqt ajab uljhanon mein Dal gaya

wo ek shaKHs ki sidhe subhaw aisa tha

chali jo baat koi raat ke taaqub mein

to baat baat se nikli bahaw aisa tha

main pura pura rawana tha abjadon ki taraf

hisab-e-umr tera chal-chalaw aisa tha

gul-e-nashat ki KHushbu bhi bar thi mujh ko

mere mizaj mein gham ka rachaw aisa tha

kanar-e-lab mein na rahti thi mauj-e-goyai

tabiaton mein suKHan ka bahaw aisa tha

Thaharta kya meri KHakistari nigahon mein

tera wajud to raushan alaw aisa tha

nikal saki na koi bhi farar ki surat

sipah-e-zist ka mujh par paDaw aisa tha

na chah kar bhi use dil se chahte the hum

kisi ki lag mein 'tabish' lagaw aisa tha