mere dagh-e-dil wo charagh hain nahin nisbaten jinhen sham se

mire dāġh-e-dil vo charāġh haiñ nahīñ nisbateñ jinheñ shaam se

unheñ tū hī aa ke bujhā.egā ye jale haiñ tere hī naam se

maiñ huuñ ek āshiq-e-be-navā tū navāz apne payām se

ye tirī razā pe tirī ḳhushī tū pukār le kisī naam se

maiñ to gum huuñ terī talāsh meñ mujhe kaun jaane tire sivā

koī kaise mahram-e-rāz ho tirī āshiqī ke maqām se

tirā ishq hai mirī zindagī tirā zikr hai mirī bandagī

tujhe yaad kartā huuñ maiñ sadā mujhe kaam hai isī kaam se

kabhī mai-kade pe jo dil rahā tire āshiqoñ kī nazar paḌe

use kahiye bāda-e-ma.arifat jo chhalak paḌe abhī jaam se

kahīñ uTh ke jā.ūñ maiñ kyuuñ 'fanā' ki payām us kā milā mujhe

jo milā kabhī to milegā vo mujhe dard-e-dil ke maqām se

mere dagh-e-dil wo charagh hain nahin nisbaten jinhen sham se

unhen tu hi aa ke bujhaega ye jale hain tere hi nam se

main hun ek aashiq-e-be-nawa tu nawaz apne payam se

ye teri raza pe teri KHushi tu pukar le kisi nam se

main to gum hun teri talash mein mujhe kaun jaane tere siwa

koi kaise mahram-e-raaz ho teri aashiqi ke maqam se

tera ishq hai meri zindagi tera zikr hai meri bandagi

tujhe yaad karta hun main sada mujhe kaam hai isi kaam se

kabhi mai-kade pe jo dil raha tere aashiqon ki nazar paDe

use kahiye baada-e-marifat jo chhalak paDe abhi jam se

kahin uTh ke jaun main kyun 'fana' ki payam us ka mila mujhe

jo mila kabhi to milega wo mujhe dard-e-dil ke maqam se