mere dard ki tujhe kya KHabar hai jise KHabar koi aur hai

mire dard kī tujhe kyā ḳhabar hai jise ḳhabar koī aur hai

tū ilaaj rahne de chārāgar mirā chārāgar koī aur hai

vo jo aa.ine ke hai rū-ba-rū vahī aa.ine meñ hai hū-ba-hū

ye na soch ye na ḳhayāl kar ki idhar udhar koī aur hai

haiñ jahāñ meñ ek se ik hasīñ kamī husn vāloñ kī to nahīñ

jise chāhtā huuñ maiñ ham-nashīñ vo hasīñ magar koī aur hai

alag apnī raah le nāsehā mujhe tere rāh-numā se kyā

tirā rāhbar koī aur hai mirā rāhbar koī aur hai

na farishta hai na hai aadmī ye ġhalat kisī ne samajh liyā

mire saath rāh-e-hayāt meñ mirā ham-safar koī aur hai

vo tirī nazar kā fareb hai zarā dekh dil kī nigāh se

jise tū samajhtā hai rāh-rau sar-e-rahguzar koī aur hai

yahāñ 'purnam' apnā na dil lagā ki yahāñ qayām hai aarzī

jahāñ tujh ko rahnā hai mustaqil vo makāñ vo ghar koī aur hai

mere dard ki tujhe kya KHabar hai jise KHabar koi aur hai

tu ilaj rahne de chaaragar mera chaaragar koi aur hai

wo jo aaine ke hai ru-ba-ru wahi aaine mein hai hu-ba-hu

ye na soch ye na KHayal kar ki idhar udhar koi aur hai

hain jahan mein ek se ek hasin kami husn walon ki to nahin

jise chahta hun main ham-nashin wo hasin magar koi aur hai

alag apni rah le naseha mujhe tere rah-numa se kya

tera rahbar koi aur hai mera rahbar koi aur hai

na farishta hai na hai aadmi ye ghalat kisi ne samajh liya

mere sath rah-e-hayat mein mera ham-safar koi aur hai

wo teri nazar ka fareb hai zara dekh dil ki nigah se

jise tu samajhta hai rah-rau sar-e-rahguzar koi aur hai

yahan 'purnam' apna na dil laga ki yahan qayam hai aarzi

jahan tujh ko rahna hai mustaqil wo makan wo ghar koi aur hai