mere dil ke dagh KHuda rakhe rah-e-gham mein jalwa-kunan rahe

mire dil ke daaġh ḳhudā rakhe rah-e-ġham meñ jalva-kunāñ rahe

kabhī chāñdnī kī tarah khile kabhī ban ke kāhkashāñ rahe

vahī aarzū vahī marhale vahī justujū vahī silsile

tujhe pā ke bhī vahī fāsle tirī qurbatoñ meñ nihāñ rahe

maiñ shikasta-hāl-o-shikasta-pā tah-e-dām aa bhī gayā to kyā

mirī aarzū meñ to dam rahā mire hausle to javāñ rahe

ye batā ki sāqī-e-ḳhush-nazar vahī jaam hai vahī mai magar

vo balā-kashān-e-junūñ-asar tire mai-kade meñ kahāñ rahe

koī kyā 'bahār' samajh sake ki ye apnā apnā nasīb hai

koī dāġh-e-nūr-e-jabīñ bane koī rūh-o-dil kā ziyāñ rahe

mere dil ke dagh KHuda rakhe rah-e-gham mein jalwa-kunan rahe

kabhi chandni ki tarah khile kabhi ban ke kahkashan rahe

wahi aarzu wahi marhale wahi justuju wahi silsile

tujhe pa ke bhi wahi fasle teri qurbaton mein nihan rahe

main shikasta-haal-o-shikasta-pa tah-e-dam aa bhi gaya to kya

meri aarzu mein to dam raha mere hausle to jawan rahe

ye bata ki saqi-e-KHush-nazar wahi jam hai wahi mai magar

wo bala-kashan-e-junun-asar tere mai-kade mein kahan rahe

koi kya 'bahaar' samajh sake ki ye apna apna nasib hai

koi dagh-e-nur-e-jabin bane koi ruh-o-dil ka ziyan rahe