mere dil ki KHataen bhi qayamat hain qayamat hain

mire dil kī ḳhatā.eñ bhī qayāmat haiñ qayāmat haiñ

ḳhatāoñ par sazā.eñ bhī qayāmat haiñ qayāmat haiñ

kahāñ se maiñ kahāñ aayā kahāñ se dil kahāñ pahuñchā

mohabbat kī havā.eñ bhī qayāmat haiñ qayāmat haiñ

nahīñ ma.alūm kyā roz-e-jazā pesh aane vaalā hai

qayāmat meñ sazā.eñ bhī qayāmat haiñ qayāmat haiñ

koī jiitā hai un se aur martā hai koī un par

lagāvaT kī adā.eñ bhī qayāmat haiñ qayāmat haiñ

ilāj-e-ishq se ai chāra-gar taklīf baḌhtī hai

mire haq meñ davā.eñ bhī qayāmat haiñ qayāmat haiñ

yahī kahtā hai sun sun kar vo ahl-e-ġham ke nāloñ ko

faqīroñ kī sadā.eñ bhī qayāmat haiñ qayāmat haiñ

idhar merī tabī.at bhī nahīñ ruktī nahīñ thamtī

udhar un kī adā.eñ bhī qayāmat haiñ qayāmat haiñ

chalo rindoñ baḌho aao piyo phir fasl-e-gul aa.ī

ye saaqī kī sadā.eñ bhī qayāmat haiñ qayāmat haiñ

kahīñ aisā na ho baḌh jaa.e pahle se junūñ merā

ghaTā.eñ bhī havā.eñ bhī qayāmat haiñ qayāmat haiñ

qayāmat ke jo munkir hoñ vo dekheñ merī ā.ankhoñ se

hasīnoñ kī adā.eñ bhī qayāmat haiñ qayāmat haiñ

dam-e-be-dād vo ai 'nūh' dil meñ ye samajh rakkhe

hamārī bad-duā.eñ bhī qayāmat haiñ qayāmat haiñ

mere dil ki KHataen bhi qayamat hain qayamat hain

KHataon par sazaen bhi qayamat hain qayamat hain

kahan se main kahan aaya kahan se dil kahan pahuncha

mohabbat ki hawaen bhi qayamat hain qayamat hain

nahin malum kya roz-e-jaza pesh aane wala hai

qayamat mein sazaen bhi qayamat hain qayamat hain

koi jita hai un se aur marta hai koi un par

lagawaT ki adaen bhi qayamat hain qayamat hain

ilaj-e-ishq se ai chaara-gar taklif baDhti hai

mere haq mein dawaen bhi qayamat hain qayamat hain

yahi kahta hai sun sun kar wo ahl-e-gham ke nalon ko

faqiron ki sadaen bhi qayamat hain qayamat hain

idhar meri tabiat bhi nahin rukti nahin thamti

udhar un ki adaen bhi qayamat hain qayamat hain

chalo rindon baDho aao piyo phir fasl-e-gul aai

ye saqi ki sadaen bhi qayamat hain qayamat hain

kahin aisa na ho baDh jae pahle se junun mera

ghaTaen bhi hawaen bhi qayamat hain qayamat hain

qayamat ke jo munkir hon wo dekhen meri aaankhon se

hasinon ki adaen bhi qayamat hain qayamat hain

dam-e-be-dad wo ai 'nuh' dil mein ye samajh rakkhe

hamari bad-duaen bhi qayamat hain qayamat hain