mere ghar ki inTen chura le gaya wo

mire ghar kī īñTeñ churā le gayā vo

nahīñ jāntā hai ki kyā le gayā vo

use kyā zarūrat thī vo jāntā hai

jo ghar meñ parāyā ḳhudā le gayā vo

sar-e-rāh jis ne kiyā qatl merā

sitam hai mirā ḳhūñ-bahā le gayā vo

mirā rotā bachcha bahaltā thā jis se

vo lakḌī kā hāthī uThā le gayā vo

saḳhāvat ne us ko dhanī kar diyā hai

faqīroñ kī sachchī duā le gayā vo

use to zarūrat thī chiñgāriyoñ kī

havāoñ meñ sho.ale dabā le gayā vo

vo kal aa.egā aag is meñ lagāne

mirī jhoñpaḌī kā pata le gayā vo

lubhāne kī us meñ adā kab thī pahle

mirī shā.erī kī adā le gayā vo

vo but ham se mil kar banā somnātī

ki sone kā paanī chaḌhā le gayā vo

mere ghar ki inTen chura le gaya wo

nahin jaanta hai ki kya le gaya wo

use kya zarurat thi wo jaanta hai

jo ghar mein paraya KHuda le gaya wo

sar-e-rah jis ne kiya qatl mera

sitam hai mera KHun-baha le gaya wo

mera rota bachcha bahalta tha jis se

wo lakDi ka hathi uTha le gaya wo

saKHawat ne us ko dhani kar diya hai

faqiron ki sachchi dua le gaya wo

use to zarurat thi chingariyon ki

hawaon mein shoale daba le gaya wo

wo kal aaega aag is mein lagane

meri jhonpaDi ka pata le gaya wo

lubhane ki us mein ada kab thi pahle

meri shaeri ki ada le gaya wo

wo but hum se mil kar bana somnati

ki sone ka pani chaDha le gaya wo