mere haal se nahin be-KHabar mera kuza-gar

mire haal se nahīñ be-ḳhabar mirā kūza-gar

ki hai shāh-rag se qarīb-tar mirā kūza-gar

kabhī baḳhsh de mire ḳhadd-o-ḳhāl ko tāzgī

kabhī noch le mire bāl-o-par mirā kūza-gar

kahīñ jān-e-jāñ kahīñ mehrbāñ kahīñ rāz-dāñ

kahīñ nukta-bīñ kahīñ nukta-var mirā kūza-gar

mirī ḳhūbiyoñ mirī ḳhāmiyoñ se hai be-ḳhabar

nahīñ be-basar nahīñ kam-nazar mirā kūza-gar

mirā aa.ina kabhī sañg-o-ḳhisht meñ Dhaal de

kabhī toḌ de mujhe joḌ kar mirā kūza-gar

mujhe aise lagtā hai mere jism kī ḳhaak ko

abhī aur rakkhegā chaak par mirā kūza-gar

mujhe rāstoñ kī sa.ūbatoñ se nahīñ ḳhatar

mire saath hai mirā ham-safar mirā kūza-gar

vahī zaḳhm de vahī zaḳhm-e-dil kī davā kare

mirā mehrbāñ mirā chāra-gar mirā kūza-gar

mere haal se nahin be-KHabar mera kuza-gar

ki hai shah-rag se qarib-tar mera kuza-gar

kabhi baKHsh de mere KHadd-o-KHal ko tazgi

kabhi noch le mere baal-o-par mera kuza-gar

kahin jaan-e-jaan kahin mehrban kahin raaz-dan

kahin nukta-bin kahin nukta-war mera kuza-gar

meri KHubiyon meri KHamiyon se hai be-KHabar

nahin be-basar nahin kam-nazar mera kuza-gar

mera aaina kabhi sang-o-KHisht mein Dhaal de

kabhi toD de mujhe joD kar mera kuza-gar

mujhe aise lagta hai mere jism ki KHak ko

abhi aur rakkhega chaak par mera kuza-gar

mujhe raston ki saubaton se nahin KHatar

mere sath hai mera ham-safar mera kuza-gar

wahi zaKHm de wahi zaKHm-e-dil ki dawa kare

mera mehrban mera chaara-gar mera kuza-gar