mere haq mein koi aisi dua kar

mire haq meñ koī aisī duā kar

maiñ zinda rah sakūñ tujh ko bhulā kar

fasurda huuñ tujhe kho kar ki jaise

koī bachcha qalam taḳhtī gañvā kar

yahāñ sūraj se ḳhālī din haiñ saare

kahā to thā tujhe raushan diyā kar

bhulāne kī maiñ koshish kar rahā huuñ

tirī tasvīr kamre meñ sajā kar

huā mahrūm maiñ shams o qamar se

ghanā ik peḌ āñgan meñ lagā kar

mujhe mere muqābil kar diyā hai

kisī ne ā.īna mujh ko dikhā kar

ḳhud apnā rāsta hī kho diyā hai

safar meñ gard paañv se uḌā kar

maiñ kaise shauq kī taskīn kartā

kisī zaḳhmī parinde ko uḌā kar

maiñ chuntā phirtā huuñ kāġhaz ke TukḌe

kitāboñ ko samundar meñ bahā kar

ghuTan ko kar liyā apnā muqaddar

makāñ ko shahr se ūñchā uThā kar

maiñ us ko jāntā huuñ baat merī

vo ab bhī Taal degā muskurā kar

'naved'-e-sub.h kā hāsil hai sūraj

ujālā hogā tāroñ ko miTā kar

mere haq mein koi aisi dua kar

main zinda rah sakun tujh ko bhula kar

fasurda hun tujhe kho kar ki jaise

koi bachcha qalam taKHti ganwa kar

yahan suraj se KHali din hain sare

kaha to tha tujhe raushan diya kar

bhulane ki main koshish kar raha hun

teri taswir kamre mein saja kar

hua mahrum main shams o qamar se

ghana ek peD aangan mein laga kar

mujhe mere muqabil kar diya hai

kisi ne aaina mujh ko dikha kar

KHud apna rasta hi kho diya hai

safar mein gard panw se uDa kar

main kaise shauq ki taskin karta

kisi zaKHmi parinde ko uDa kar

main chunta phirta hun kaghaz ke TukDe

kitabon ko samundar mein baha kar

ghuTan ko kar liya apna muqaddar

makan ko shahr se uncha uTha kar

main us ko jaanta hun baat meri

wo ab bhi Tal dega muskura kar

'nawed'-e-subh ka hasil hai suraj

ujala hoga taron ko miTa kar