mere kaghaz pe hain lafzon ke tabinda sitare

mire kāġhaz pe haiñ lafzoñ ke tābinda sitāre

zamīn-e-sher se nikle daraḳhshanda sitāre

bisāt-e-raftagān-e-fan lapeTī jā chukī hai

sar-e-charḳh-e-hunar maujūd haiñ zinda sitāre

muqaddar kī lakīreñ khīñchne vaalā ḳhudā hai

nahīñ hote muqaddar ke navīsanda sitāre

nadāmat ke sabab kyā muñh dikhā.eñge sahar ko

ki haiñ jurm-e-tunuk-tābī pe sharminda sitāre

na hoñge bai'at-e-shab ke liye tayyār hargiz

vo maujūda sitāre hoñ ki ā.inda sitāre

fasīl-e-vaqt par kanda rahegā naam apnā

ki ham haiñ ahd-e-hāzir ke numā.inda sitāre

zamīñ ke goshe goshe par nazar rakhte haiñ 'yāvar'

jamāl-e-sub.h-e-fardā ke haiñ joinda sitāre

mere kaghaz pe hain lafzon ke tabinda sitare

zamin-e-sher se nikle daraKHshanda sitare

bisat-e-raftagan-e-fan lapeTi ja chuki hai

sar-e-charKH-e-hunar maujud hain zinda sitare

muqaddar ki lakiren khinchne wala KHuda hai

nahin hote muqaddar ke nawisanda sitare

nadamat ke sabab kya munh dikhaenge sahar ko

ki hain jurm-e-tunuk-tabi pe sharminda sitare

na honge bai'at-e-shab ke liye tayyar hargiz

wo maujuda sitare hon ki aainda sitare

fasil-e-waqt par kanda rahega nam apna

ki hum hain ahd-e-hazir ke numainda sitare

zamin ke goshe goshe par nazar rakhte hain 'yawar'

jamal-e-subh-e-farda ke hain joinda sitare