mere labon pe usi aadmi ki pyas na ho

mire laboñ pe usī aadmī kī pyaas na ho

jo chāhtā hai mire sāmne gilās na ho

ye tishnagī to milī hai hameñ virāsat meñ

hamāre vāste dariyā koī udaas na ho

tamām din ke dukhoñ kā hisāb karnā hai

maiñ chāhtā huuñ koī mere ās-pās na ho

mujhe bhī dukh hai ḳhatā ho gayā nishāna tirā

kamān khīñch maiñ hāzir huuñ tū udaas na ho

ġhazal hī rah ga.ī tāhir-'farāz' apne liye

jahāñ meñ koī aisā bhī be-asās na ho

mere labon pe usi aadmi ki pyas na ho

jo chahta hai mere samne gilas na ho

ye tishnagi to mili hai hamein wirasat mein

hamare waste dariya koi udas na ho

tamam din ke dukhon ka hisab karna hai

main chahta hun koi mere aas-pas na ho

mujhe bhi dukh hai KHata ho gaya nishana tera

kaman khinch main hazir hun tu udas na ho

ghazal hi rah gai tahir-'faraaz' apne liye

jahan mein koi aisa bhi be-asas na ho