mere lahu ko mere zaKHm ki dawa kahiye

mire lahū ko mire zaḳhm kī davā kahiye

jale makāñ ke dhueñ ko hī ab sabā kahiye

bilakte shahr kī galiyoñ se ugne vaalī sahar

sahar nahīñ hai use raat kī qazā kahiye

lahū rulātī rahī jo vafā kī tā'bīreñ

vafā na kahiye ise ab ise jafā kahiye

baḌhegā zulm to uTh jā.egā lihāz-o-adab

hamārā haath jo uTThā to muqtazā kahiye

sabhī ne sabr kī talqīn kī hameñ lekin

chhalak bhī jaa.e ye sāġhar kabhī to kyā kahiye

mere lahu ko mere zaKHm ki dawa kahiye

jale makan ke dhuen ko hi ab saba kahiye

bilakte shahr ki galiyon se ugne wali sahar

sahar nahin hai use raat ki qaza kahiye

lahu rulati rahi jo wafa ki ta'biren

wafa na kahiye ise ab ise jafa kahiye

baDhega zulm to uTh jaega lihaz-o-adab

hamara hath jo uTTha to muqtaza kahiye

sabhi ne sabr ki talqin ki hamein lekin

chhalak bhi jae ye saghar kabhi to kya kahiye