mere qalam ka agar sar kabhi qalam hoga

mire qalam kā agar sar kabhī qalam hogā

nayā fasāna-e-dard-o-alam raqam hogā

ye māntī huuñ miTā degā merā daur mujhe

na.e zamāne kā is ḳhaak se janam hogā

maiñ apne aap kī pahchān bhuul baiThī huuñ

ab is se aur baḌā kyā koī sitam hogā

na jaane kyuuñ mujhe sach bolne kī aadat hai

ye jaan kar ki har ik gaam sar qalam hogā

chalo uThāte haiñ aivān-e-vaqt kā malba

usī meñ dafn mirī zaat kā sanam hogā

falak ne muuñd liiñ āñkheñ zamīñ ne rokī saañs

'ayāñ' kā aaj na.ī raah par qadam hogā

mere qalam ka agar sar kabhi qalam hoga

naya fasana-e-dard-o-alam raqam hoga

ye manti hun miTa dega mera daur mujhe

nae zamane ka is KHak se janam hoga

main apne aap ki pahchan bhul baiThi hun

ab is se aur baDa kya koi sitam hoga

na jaane kyun mujhe sach bolne ki aadat hai

ye jaan kar ki har ek gam sar qalam hoga

chalo uThate hain aiwan-e-waqt ka malba

usi mein dafn meri zat ka sanam hoga

falak ne mund lin aankhen zamin ne roki sans

'ayan' ka aaj nai rah par qadam hoga