mere shauq-e-justuju ka kise etibar hota

mire shauq-e-justujū kā kise e'tibār hotā

sar-e-rāh manziloñ tak na agar ġhubār hotā

maiñ tujhe ḳhudā samajh kar na gunāhgār hotā

agar ek be-niyāzī hī tirā ash.ār hotā

jo sitam-zadoñ kā yā-rab koī ġham-gusār hotā

to ġham-e-hayāt itnā na diloñ pe baar hotā

mirī zindagī meñ shāmil jo na terā pyaar hotā

to nashāt-e-do-jahāñ bhī mujhe nāgavār hotā

yahī mahr o maah o anjum ko gila hai mujh se yā-rab

ki unheñ bhī chain miltā jo mujhe qarār hotā

na sukūn-e-dil kī chāhat meñ taḌap 'adīb' itnā

kisī aur ko tū miltā jo kahīñ qarār hotā

mere shauq-e-justuju ka kise e'tibar hota

sar-e-rah manzilon tak na agar ghubar hota

main tujhe KHuda samajh kar na gunahgar hota

agar ek be-niyazi hi tera ashaar hota

jo sitam-zadon ka ya-rab koi gham-gusar hota

to gham-e-hayat itna na dilon pe bar hota

meri zindagi mein shamil jo na tera pyar hota

to nashat-e-do-jahan bhi mujhe nagawar hota

yahi mahr o mah o anjum ko gila hai mujh se ya-rab

ki unhen bhi chain milta jo mujhe qarar hota

na sukun-e-dil ki chahat mein taDap 'adib' itna

kisi aur ko tu milta jo kahin qarar hota