mere sune ujDe dayar mein kabhi do ghaDi hi qayam kar

mire suune ujḌe dayār meñ kabhī do ghaḌī hī qayām kar

ho jo dil to us meñ sukūn le tirā jī kare to ḳhirām kar

maiñ tamām umr guzār duuñ jise sochte jise chāhte

tū jo kar sake mire ham-navā to vo ek pal mire naam kar

mujhe apne dil kā vo raaz de jo ḳhushī se mujh ko navāz de

vo jo mujh meñ ruuh sī phūñk de kisī roz aisā kalām kar

mirī dhaḌkanoñ kā ye silsila tire pyaar se hai ravāñ-davāñ

tū jo chāhe is ko davām de jo nahīñ to is ko tamām kar

sar-e-shām mujh se tū mil vahāñ jahāñ ujlatoñ kā na ho nishāñ

kahīñ duur tak yuuñ hī saath chal mirā haath haath meñ thaam kar

tirī chāhatoñ kā faqīr huuñ mujhe qurbatoñ kī niyāz de

zarā paas aa ke tū mil mujhe yūñhī duur se na salām kar

koī kaam karnā hai gar 'zakī' to ye kaam kar mire dostā

kahīñ nafratoñ ko na jā mile tū mohabbatoñ ko yuuñ aam kar

mere sune ujDe dayar mein kabhi do ghaDi hi qayam kar

ho jo dil to us mein sukun le tera ji kare to KHiram kar

main tamam umr guzar dun jise sochte jise chahte

tu jo kar sake mere ham-nawa to wo ek pal mere nam kar

mujhe apne dil ka wo raaz de jo KHushi se mujh ko nawaz de

wo jo mujh mein ruh si phunk de kisi roz aisa kalam kar

meri dhaDkanon ka ye silsila tere pyar se hai rawan-dawan

tu jo chahe is ko dawam de jo nahin to is ko tamam kar

sar-e-sham mujh se tu mil wahan jahan ujlaton ka na ho nishan

kahin dur tak yun hi sath chal mera hath hath mein tham kar

teri chahaton ka faqir hun mujhe qurbaton ki niyaz de

zara pas aa ke tu mil mujhe yunhi dur se na salam kar

koi kaam karna hai gar 'zaki' to ye kaam kar mere dosta

kahin nafraton ko na ja mile tu mohabbaton ko yun aam kar