mere wahm-o-guman se bhi ziyaada TuT jata hai

mire vahm-o-gumāñ se bhī ziyāda TuuT jaatā hai

ye dil apnī hadoñ meñ rah ke itnā TuuT jaatā hai

maiñ ro.uuñ to dar-o-dīvār mujh par hañsne lagte haiñ

hañsūñ to mere andar jaane kyā kyā TuuT jaatā hai

maiñ jis lamhe kī ḳhvāhish meñ safar kartā huuñ sadiyoñ kā

kahīñ pāñv-tale aa kar vo lamha TuuT jaatā hai

mire ḳhvāboñ kī bastī se janāze uThte jaate haiñ

mirī āñkheñ jise chhū leñ vo sapnā TuuT jaatā hai

na jaane kitnī muddat se hai dil meñ ye amal jaarī

zarā sī Thes lagtī hai zarā sā TuuT jaatā hai

dil-e-nādāñ hamārī to numū hī nā-mukammal thī

to hairat kyā jo bante hī irāda TuuT jaatā hai

muqaddar meñ mire 'sāgar' shikast-o-reḳht itnī hai

maiñ jis ko apnā kah duuñ vo sitārā TuuT jaatā hai

mere wahm-o-guman se bhi ziyaada TuT jata hai

ye dil apni hadon mein rah ke itna TuT jata hai

main roun to dar-o-diwar mujh par hansne lagte hain

hansun to mere andar jaane kya kya TuT jata hai

main jis lamhe ki KHwahish mein safar karta hun sadiyon ka

kahin panw-tale aa kar wo lamha TuT jata hai

mere KHwabon ki basti se janaze uThte jate hain

meri aankhen jise chhu len wo sapna TuT jata hai

na jaane kitni muddat se hai dil mein ye amal jari

zara si Thes lagti hai zara sa TuT jata hai

dil-e-nadan hamari to numu hi na-mukammal thi

to hairat kya jo bante hi irada TuT jata hai

muqaddar mein mere 'sagar' shikast-o-reKHt itni hai

main jis ko apna kah dun wo sitara TuT jata hai