mere zehn-o-dil par jo chhaya hua hai

mire zehn-o-dil par jo chhāyā huā hai

mujhe us ne yaksar bhulāyā huā hai

har ik naqsh-e-duniyā miTāyā huā hai

use maiñ ne dil meñ basāyā huā hai

bahut duur mahsūs hotā hai mujh ko

gale jis ko maiñ ne lagāyā huā hai

mujhe ḳhauf hai silvaTeñ paḌ na jaa.eñ

badan us ne apnā bichhāyā huā hai

tumheñ DhūñDne se nahīñ milne vaalā

nishān apnā maiñ ne miTāyā huā hai

bhaTakte haiñ sahrā meñ kitne musāfir

har ik naqsh-e-pā kā safāyā huā hai

yahī jā-nashīñ hai mirī mumlikat kā

baġhal meñ jo bachcha sulāyā huā hai

mere zehn-o-dil par jo chhaya hua hai

mujhe us ne yaksar bhulaya hua hai

har ek naqsh-e-duniya miTaya hua hai

use main ne dil mein basaya hua hai

bahut dur mahsus hota hai mujh ko

gale jis ko main ne lagaya hua hai

mujhe KHauf hai silwaTen paD na jaen

badan us ne apna bichhaya hua hai

tumhein DhunDne se nahin milne wala

nishan apna main ne miTaya hua hai

bhaTakte hain sahra mein kitne musafir

har ek naqsh-e-pa ka safaya hua hai

yahi ja-nashin hai meri mumlikat ka

baghal mein jo bachcha sulaya hua hai