meri aankhen gawah-e-talat-e-atish huin jal kar

mirī āñkheñ gavāh-e-tal.at-e-ātish huiiñ jal kar

pahāḌoñ par chamaktī bijliyāñ niklīñ udhar chal kar

zabāñ kā zā.iqa bigḌā huā hai mai pilā saaqī

sumūm-e-dasht ne sab rakh diye kām-o-dahan tal kar

rumūz-e-zindagī sīkhe haiñ mere shauq-e-vahshat ne

ka.ī sāhib-nazar zindāniyoñ ke biich meñ pal kar

ye kis zauq-e-numū ko aaj dohrāne bahār aa.ī

lahū ham sarfaroshoñ kā jabīn-e-nāz par mal kar

vo jin kī ḳhū se kal ik abr-e-tar ḳhvāb-e-mohabbat thā

unhī ko rakh diyā phir kyuuñ khule hāthoñ se mal-dal kar

ruḳh-e-daurāñ pe hai ik niil sā karb-e-taġhayyur se

varaq tāñbe kā kho detā hai rangat aag meñ gal kar

harī sham.eñ sī añgūroñ kī beloñ meñ jo chamkīñ thiiñ

vahī ab surḳh rañgoñ meñ jalī haiñ jaam meñ Dhal kar

vahī ik rū-e-ātish-rañg hai halkī sī dastak hai

samundar paar kī mauj-e-havā jaatī nahīñ Tal kar

jab aa.ī sā.at-e-be-tāb terī be-libāsī kī

to ā.īne meñ jitne zāviye the rah ga.e jal kar

mahak meñ zahr kī ik lahr bhī ḳhvābīda rahtī hai

zideñ aapas meñ Takrātī haiñ farq-e-mār-o-sandal kar

shab-e-afsāna-ḳhvāñ to shahr kī āḳhir huī 'madnī'

kahāñ jaate ho tum nikle hue yuuñ niiñd meñ chal kar

meri aankhen gawah-e-talat-e-atish huin jal kar

pahaDon par chamakti bijliyan niklin udhar chal kar

zaban ka zaiqa bigDa hua hai mai pila saqi

sumum-e-dasht ne sab rakh diye kaam-o-dahan tal kar

rumuz-e-zindagi sikhe hain mere shauq-e-wahshat ne

kai sahib-nazar zindaniyon ke bich mein pal kar

ye kis zauq-e-numu ko aaj dohrane bahaar aai

lahu hum sarfaroshon ka jabin-e-naz par mal kar

wo jin ki KHu se kal ek abr-e-tar KHwab-e-mohabbat tha

unhi ko rakh diya phir kyun khule hathon se mal-dal kar

ruKH-e-dauran pe hai ek nil sa karb-e-taghayyur se

waraq tanbe ka kho deta hai rangat aag mein gal kar

hari shamen si anguron ki belon mein jo chamkin thin

wahi ab surKH rangon mein jali hain jam mein Dhal kar

wahi ek ru-e-atish-rang hai halki si dastak hai

samundar par ki mauj-e-hawa jati nahin Tal kar

jab aai saat-e-be-tab teri be-libasi ki

to aaine mein jitne zawiye the rah gae jal kar

mahak mein zahr ki ek lahr bhi KHwabida rahti hai

ziden aapas mein Takraati hain farq-e-mar-o-sandal kar

shab-e-afsana-KHwan to shahr ki aaKHir hui 'madni'

kahan jate ho tum nikle hue yun nind mein chal kar