meri aankhon mein jab bhi tere manzar baiTh jate hain

mirī āñkhoñ meñ jab bhī tere manzar baiTh jaate haiñ

to in ḳhālī safīnoñ meñ samundar baiTh jaate haiñ

kahā kis ne Thikāne par qalandar baiTh jaate haiñ

ba-zāhir phirte rahte haiñ par andar baiTh jaate haiñ

mujhe duniyā ke ta.anoñ par kabhī ġhussa nahīñ aatā

nadī kī tah meñ jā ke saare patthar baiTh jaate haiñ

yuuñ uTh uTh kar hamārā bolnā dikhlā.e mahrūmī

vo jin ko yaar ho jaa.e mayassar baiTh jaate haiñ

hamīñ ko shaam ne tanhā rakhā varna ye vo pal haiñ

ki din aur raat bhī milne ufuq par baiTh jaate haiñ

ai āvāra ḳhayālo ashk-bārī meñ to ruk jaao

parinde bhī to bārish meñ simaT kar baiTh jaate haiñ

hamārā aur un kā rabt hai bas hāzirī tak hī

vo rasman naam lete haiñ ham uTh kar baiTh jaate haiñ

baḌe charche haiñ 'ālam' aap kī ḳhāna-ḳharābī ke

ḳhudā kā shukr hai maqte meñ aa kar baiTh jaate haiñ

meri aankhon mein jab bhi tere manzar baiTh jate hain

to in KHali safinon mein samundar baiTh jate hain

kaha kis ne Thikane par qalandar baiTh jate hain

ba-zahir phirte rahte hain par andar baiTh jate hain

mujhe duniya ke tanon par kabhi ghussa nahin aata

nadi ki tah mein ja ke sare patthar baiTh jate hain

yun uTh uTh kar hamara bolna dikhlae mahrumi

wo jin ko yar ho jae mayassar baiTh jate hain

hamin ko sham ne tanha rakha warna ye wo pal hain

ki din aur raat bhi milne ufuq par baiTh jate hain

ai aawara KHayalo ashk-bari mein to ruk jao

parinde bhi to barish mein simaT kar baiTh jate hain

hamara aur un ka rabt hai bas haziri tak hi

wo rasman nam lete hain hum uTh kar baiTh jate hain

baDe charche hain 'alam' aap ki KHana-KHarabi ke

KHuda ka shukr hai maqte mein aa kar baiTh jate hain