meri aarzu ka hasil meri zist ka sahaara

mirī aarzū kā hāsil mirī ziist kā sahārā

tirā ik hasīñ tabassum tirā jalva-e-ḳhud-ārā

tire dard-o-ġham ke sadqe tirī be-ruḳhī ke qurbāñ

inhīñ kaj-adā.iyoñ ne mirī ziist ko sañvārā

mirī kashti-e-tamannā hai ajiib kashmakash meñ

kabhī hai qarīb manzil kabhī duur hai kinārā

kabhī ye ḳhayāl guzrā ki nazar ke sāmne ho

kabhī ye gumāñ huā hai ki mujhe kahīñ pukārā

jo mile bhī ho to kyā hai tumheñ pā ke DhūñDte haiñ

tumheñ be-ruḳhī mubārak hameñ justujū gavārā

tirī shaan be-niyāzī mirā ye junūn-e-paiham

tirī yaad de rahī hai mire zabt ko sahārā

kabhī nau-bahār ban kar ho chaman chaman meñ raqsāñ

kabhī ko.eloñ ke lab par kabhī gul se āshkārā

kabhī dil ko chain miltā kabhī dard dam to letā

tujhe be-qarār 'zebā' isī aarzū ne maarā

meri aarzu ka hasil meri zist ka sahaara

tera ek hasin tabassum tera jalwa-e-KHud-ara

tere dard-o-gham ke sadqe teri be-ruKHi ke qurban

inhin kaj-adaiyon ne meri zist ko sanwara

meri kashti-e-tamanna hai ajib kashmakash mein

kabhi hai qarib manzil kabhi dur hai kinara

kabhi ye KHayal guzra ki nazar ke samne ho

kabhi ye guman hua hai ki mujhe kahin pukara

jo mile bhi ho to kya hai tumhein pa ke DhunDte hain

tumhein be-ruKHi mubarak hamein justuju gawara

teri shan be-niyazi mera ye junun-e-paiham

teri yaad de rahi hai mere zabt ko sahaara

kabhi nau-bahaar ban kar ho chaman chaman mein raqsan

kabhi koelon ke lab par kabhi gul se aashkara

kabhi dil ko chain milta kabhi dard dam to leta

tujhe be-qarar 'zeba' isi aarzu ne mara