meri aarzu ki hudud mein ye falak nahin ye zamin nahin

mirī aarzū kī hudūd meñ ye falak nahīñ ye zamīñ nahīñ

mujhe bazm-e-quds meñ de jagah jo vahāñ nahīñ to kahīñ nahīñ

hai jabīñ to asl meñ vo jabīñ ki jhuke vahāñ to jhukī rahe

tire āstāñ se jo uTh ga.ī vo jabīñ to koī jabīñ nahīñ

mire dil kī nazr qubūl kar jo ishāra ho to ye sar nisār

ki vafā-e-ahd kī shart meñ kahīñ darj lafz nahīñ nahīñ

ye arab bhī hai mire rū-ba-rū ye ajam bhī hai mire sāmne

mirī justujū ko yaqīn hai kahīñ tujh sā koī hasīñ nahīñ

tire kund teshe se rāh-rau ye chaTān kaise kaTe bhalā

tire haath yaḳh tire paañv shal tire dil meñ soz-e-yaqīñ nahīñ

ye jo bandagī hai 'urūj' kī tirī zindagī se hai qīmtī

na ho bandagī to fuzūl hai koī vazn us kā kahīñ nahīñ

meri aarzu ki hudud mein ye falak nahin ye zamin nahin

mujhe bazm-e-quds mein de jagah jo wahan nahin to kahin nahin

hai jabin to asl mein wo jabin ki jhuke wahan to jhuki rahe

tere aastan se jo uTh gai wo jabin to koi jabin nahin

mere dil ki nazr qubul kar jo ishaara ho to ye sar nisar

ki wafa-e-ahd ki shart mein kahin darj lafz nahin nahin

ye arab bhi hai mere ru-ba-ru ye ajam bhi hai mere samne

meri justuju ko yaqin hai kahin tujh sa koi hasin nahin

tere kund teshe se rah-rau ye chaTan kaise kaTe bhala

tere hath yaKH tere panw shal tere dil mein soz-e-yaqin nahin

ye jo bandagi hai 'uruj' ki teri zindagi se hai qimti

na ho bandagi to fuzul hai koi wazn us ka kahin nahin