meri baaton pe duniya ki hansi kam hoti jati hai

mirī bātoñ pe duniyā kī hañsī kam hotī jaatī hai

mirī dīvāngī shāyad musallam hotī jaatī hai

tavajjoh kī nazar merī taraf kam hotī jaatī hai

maiñ ḳhush huuñ ishq kī buniyād mohkam hotī jaatī hai

zarūrat kuchh bhī kahne kī bahut kam hotī jaatī hai

mirī sūrat hī ab shauq-e-mujassam hotī jaatī hai

kabhī tū ne pukārā thā mujhe kuchh shak sā hotā hai

mire kānoñ meñ ik āvāz paiham hotī jaatī hai

mujhe samjhāne aa.e haiñ ki maiñ rone se baaz aa.uuñ

mire samjhāne vāloñ kī nazar nam hotī jaatī hai

abhī sun lo to shāyad sun sako tum dil ke naġhmoñ ko

ki ab us kī sadā kuchh ḳhud-ba-ḳhud kam hotī jaatī hai

vahī dil hai magar ab vo nahīñ aglī sī betābī

vahī ḳhuuñ hai magar raftār maddham hotī jaatī hai

tujhe maz.hab miTānā hī paḌegā rū-e-hastī se

tire hāthoñ bahut tauhīn-e-ādam hotī jaatī hai

nashāt-e-zīst kī zāmin hai ab yād-e-mohabbat hī

yahī ḳhud ishq ke zaḳhmoñ kā marham hotī jaatī hai

mohabbat hī se kholo tum dil-e-'mullā' kā darvāza

yahī is ke liye ab ism-e-āzam hotī jaatī hai

meri baaton pe duniya ki hansi kam hoti jati hai

meri diwangi shayad musallam hoti jati hai

tawajjoh ki nazar meri taraf kam hoti jati hai

main KHush hun ishq ki buniyaad mohkam hoti jati hai

zarurat kuchh bhi kahne ki bahut kam hoti jati hai

meri surat hi ab shauq-e-mujassam hoti jati hai

kabhi tu ne pukara tha mujhe kuchh shak sa hota hai

mere kanon mein ek aawaz paiham hoti jati hai

mujhe samjhane aae hain ki main rone se baz aaun

mere samjhane walon ki nazar nam hoti jati hai

abhi sun lo to shayad sun sako tum dil ke naghmon ko

ki ab us ki sada kuchh KHud-ba-KHud kam hoti jati hai

wahi dil hai magar ab wo nahin agli si betabi

wahi KHun hai magar raftar maddham hoti jati hai

tujhe mazhab miTana hi paDega ru-e-hasti se

tere hathon bahut tauhin-e-adam hoti jati hai

nashat-e-zist ki zamin hai ab yaad-e-mohabbat hi

yahi KHud ishq ke zaKHmon ka marham hoti jati hai

mohabbat hi se kholo tum dil-e-'mulla' ka darwaza

yahi is ke liye ab ism-e-azam hoti jati hai