meri be-zabani zaban ho na jae

mirī be-zabānī zabāñ ho na jaa.e

nihāñ hai jo dil meñ ayaañ ho na jaa.e

vo mujh par kahīñ mehrbāñ ho na jaa.e

matā-e-sukūñ rā.egāñ ho na jaa.e

sitāroñ se aage qadam rakhne vaalo

zamīn-e-sitam āsmāñ ho na jaa.e

kahīñ merī rūdād-e-dard-e-mohabbat

mirī jaañ tirī dāstāñ ho na jaa.e

mirī jur.at-e-arz husn-e-tamannā

kahīñ un ke dil par garāñ ho na jaa.e

adāvat mazālim tasādum se 'vāris'

jahannum pe jannat-nishāñ ho na jaa.e

meri be-zabani zaban ho na jae

nihan hai jo dil mein ayan ho na jae

wo mujh par kahin mehrban ho na jae

mata-e-sukun raegan ho na jae

sitaron se aage qadam rakhne walo

zamin-e-sitam aasman ho na jae

kahin meri rudad-e-dard-e-mohabbat

meri jaan teri dastan ho na jae

meri jurat-e-arz husn-e-tamanna

kahin un ke dil par garan ho na jae

adawat mazalim tasadum se 'waris'

jahannum pe jannat-nishan ho na jae