meri har sans ko sab naghma-e-mahfil samajhte hain

mirī har saañs ko sab naġhma-e-mahfil samajhte haiñ

magar ahl-e-dil āvāz-e-shikast-e-dil samajhte haiñ

gumāñ kāshāna-e-rañgīñ kā hai jis par nigāhoñ ko

use ahl-e-nazar gard-e-rah-e-manzil samajhte haiñ

ilāhī kashti-e-dil bah rahī hai kis samundar meñ

nikal aatī haiñ maujeñ ham jise sāhil samajhte haiñ

tarab-añgez haiñ rañgīniyāñ fasl-e-bahārī kī

magar bulbul unheñ ḳhūn-e-rag-e-bismil samajhte haiñ

pighal kar dil lahū ho ho ke bah jaatā hai āñkhoñ se

sitam hai sham.a ko jo zīnat-e-mahfil samajhte haiñ

kahāñ hogā Thikānā barq-raftārī un kī vahshat kā

ki vo manzil ko bhī sañg-e-rah-e-manzil samajhte haiñ

bagūle uḌ rahe haiñ jo hamāre dasht-e-vahshat meñ

unhīñ ko ai 'asar' ham parda-e-mahmil samajhte haiñ

meri har sans ko sab naghma-e-mahfil samajhte hain

magar ahl-e-dil aawaz-e-shikast-e-dil samajhte hain

guman kashana-e-rangin ka hai jis par nigahon ko

use ahl-e-nazar gard-e-rah-e-manzil samajhte hain

ilahi kashti-e-dil bah rahi hai kis samundar mein

nikal aati hain maujen hum jise sahil samajhte hain

tarab-angez hain ranginiyan fasl-e-bahaari ki

magar bulbul unhen KHun-e-rag-e-bismil samajhte hain

pighal kar dil lahu ho ho ke bah jata hai aankhon se

sitam hai shama ko jo zinat-e-mahfil samajhte hain

kahan hoga Thikana barq-raftari un ki wahshat ka

ki wo manzil ko bhi sang-e-rah-e-manzil samajhte hain

bagule uD rahe hain jo hamare dasht-e-wahshat mein

unhin ko ai 'asar' hum parda-e-mahmil samajhte hain