meri hayat agar muzhda-e-sahar bhi nahin

mirī hayāt agar muzhda-e-sahar bhī nahīñ

sitam ye hai ki tire ġham kī rahguzar bhī nahīñ

chaman meñ hoñ meñ pareshān misl-e-mauj-e-nasīm

chaTak ke ġhunche kaheñge hameñ ḳhabar bhī nahīñ

nishāt-o-kaif ke lamhoñ zarā Thahar jaao

bahār raah meñ hai duur kā safar bhī nahīñ

maiñ terī jumbish-e-mizhgāñ se kaañp jaatā hoñ

agarche dil ko ġham-e-do-jahāñ se Dar bhī nahīñ

fareb-e-va.ada pe ham tā-abad ji.eñ lekin

hazār haif ye imkān umr bhar bhī nahīñ

koī to hamdam-e-derīna de sadā is dam

vo ajnabī hoñ ki mānūs apnā ghar bhī nahīñ

nasīm sar-ba-garebāñ sabā hai sar-gardāñ

vo vaqt hai koī ḳhushbū kā rāhbar bhī nahīñ

zamīn par hī kahīñ nuur kā surāġh lagāo

sitāre Duub ga.e charḳh par qamar bhī nahīñ

kaTī hai āñkhoñ hī āñkhoñ meñ shām-e-hijr magar

shab-e-darāz-e-alam itnī muḳhtasar bhī nahīñ

kisī kī narm-nigāhī kī aañch hai varna

ye dil-pazīr navā jalva-e-hunar bhī nahīñ

havā-e-shām se kitne charāġh jal uTThe

dayār-e-dil meñ tamannā kā ik sharar bhī nahīñ

na jaane kyuuñ dar-e-zindāñ bhī kaañp uThtā hai

sadā-e-'fauq' agar aisī kārgar bhī nahīñ

meri hayat agar muzhda-e-sahar bhi nahin

sitam ye hai ki tere gham ki rahguzar bhi nahin

chaman mein hon mein pareshan misl-e-mauj-e-nasim

chaTak ke ghunche kahenge hamein KHabar bhi nahin

nishat-o-kaif ke lamhon zara Thahar jao

bahaar rah mein hai dur ka safar bhi nahin

main teri jumbish-e-mizhgan se kanp jata hon

agarche dil ko gham-e-do-jahan se Dar bhi nahin

fareb-e-wada pe hum ta-abad jien lekin

hazar haif ye imkan umr bhar bhi nahin

koi to hamdam-e-derina de sada is dam

wo ajnabi hon ki manus apna ghar bhi nahin

nasim sar-ba-gareban saba hai sar-gardan

wo waqt hai koi KHushbu ka rahbar bhi nahin

zamin par hi kahin nur ka suragh lagao

sitare Dub gae charKH par qamar bhi nahin

kaTi hai aankhon hi aankhon mein sham-e-hijr magar

shab-e-daraaz-e-alam itni muKHtasar bhi nahin

kisi ki narm-nigahi ki aanch hai warna

ye dil-pazir nawa jalwa-e-hunar bhi nahin

hawa-e-sham se kitne charagh jal uTThe

dayar-e-dil mein tamanna ka ek sharar bhi nahin

na jaane kyun dar-e-zindan bhi kanp uThta hai

sada-e-'fauq' agar aisi kargar bhi nahin