meri nigah mein lamhon ka KHwab utra tha

mirī nigāh meñ lamhoñ kā ḳhvāb utrā thā

zamīñ kī sat.h pe yā māhtāb utrā thā

vo ḳhaas lamha jise umr-e-jāvedāñ kahiye

vo ban ke vasl kā jām-e-sharāb utrā thā

ye kaisī chuuk huī be-ḳhudī meñ ham se ki bas

tamām umr musalsal azaab utrā thā

muqābla kiyā jis peḌ ne havāoñ kā

usī pe barq-e-tapāñ kā itaab utrā thā

nadī jo pyaas bujhātī thī sab kī sadiyoñ se

ḳhud us kī pyaas bujhāne sarāb utrā thā

sahīfa-e-ġham-e-hastī kā jab huā thā nuzūl

to mujh pe soz-e-mohabbat kā baab utrā thā

'karāmat' us ko to jaanā thā āsmāñ se pare

vo qāfila jo sar-e-āftāb utrā thā

meri nigah mein lamhon ka KHwab utra tha

zamin ki sath pe ya mahtab utra tha

wo KHas lamha jise umr-e-jawedan kahiye

wo ban ke wasl ka jam-e-sharab utra tha

ye kaisi chuk hui be-KHudi mein hum se ki bas

tamam umr musalsal azab utra tha

muqabla kiya jis peD ne hawaon ka

usi pe barq-e-tapan ka itab utra tha

nadi jo pyas bujhati thi sab ki sadiyon se

KHud us ki pyas bujhane sarab utra tha

sahifa-e-gham-e-hasti ka jab hua tha nuzul

to mujh pe soz-e-mohabbat ka bab utra tha

'karamat' us ko to jaana tha aasman se pare

wo qafila jo sar-e-aftab utra tha