meri shaki hai KHud meri fughan tak

mirī shākī hai ḳhud merī fuġhāñ tak

ki taalū se nahīñ lagtī zabāñ tak

koī hasrat hī le aa.e manā kar

mire rūThe hue dil ko yahāñ tak

jagah kyā dard kī bhī chhīn legā

jigar kā daaġh phailegā kahāñ tak

asar nāloñ meñ jo thā vo bhī khoyā

bahut pachhtā.e jā kar āsmāñ tak

falak tere jigar ke daaġh haiñ ham

miTā.e jā miTānā hai jahāñ tak

vo kyā pahlū meñ baiThe uTh ga.e kyā

na liiñ jaldī meñ do ik chuTkiyāñ tak

koī māñge to aa kar muntazir hai

liye thoḌī sī jaan ik nīm-jāñ tak

uThāne se ajal ke maiñ na uThtā

vo aate to kabhī mujh nā-tavāñ tak

'jalāl'-e-nāla-kash chupkā na hogā

vo de kar dekh leñ muñh meñ zabāñ tak

meri shaki hai KHud meri fughan tak

ki talu se nahin lagti zaban tak

koi hasrat hi le aae mana kar

mere ruThe hue dil ko yahan tak

jagah kya dard ki bhi chhin lega

jigar ka dagh phailega kahan tak

asar nalon mein jo tha wo bhi khoya

bahut pachhtae ja kar aasman tak

falak tere jigar ke dagh hain hum

miTae ja miTana hai jahan tak

wo kya pahlu mein baiThe uTh gae kya

na lin jaldi mein do ek chuTkiyan tak

koi mange to aa kar muntazir hai

liye thoDi si jaan ek nim-jaan tak

uThane se ajal ke main na uThta

wo aate to kabhi mujh na-tawan tak

'jalal'-e-nala-kash chupka na hoga

wo de kar dekh len munh mein zaban tak