meri shakl-o-surat se mat jaan mujhko

mirī shakl-o-sūrat se mat jaan mujh ko

mire sher se sirf pahchān mujh ko

kisī aur se 'ishq karne lagā hai

to kis haq se kahtā hai tū jaan mujh ko

kabhī mujh pe bhī nazm koī likhī hai

likhī to batā us kā 'unvān mujh ko

tujhe phir kisī se mohabbat huī hai

tirī bāteñ kartī haiñ hairān mujh ko

na kar apne mahbūb kā zikr mujh se

na kar is tarah se pareshān mujh ko

tirī mīThī bāteñ zarā sī tavajjoh

nahīñ chāhiye terā ehsān mujh ko

tujhe maiñ ne us kī jagah rakh diyā hai

mu’āfī nahīñ degā bhagvān mujh ko

faqat apnī taklīf dikhtī hai tujh ko

kabhī tū samajhtā hai insān mujh ko

mohabbat meñ ab tak marī to nahīñ huuñ

magar ab tū zinda bhī mat maan mujh ko

meri shakl-o-surat se mat jaan mujh ko

mere sher se sirf pahchan mujh ko

kisi aur se 'ishq karne laga hai

to kis haq se kahta hai tu jaan mujh ko

kabhi mujh pe bhi nazm koi likhi hai

likhi to bata us ka 'unwan mujh ko

tujhe phir kisi se mohabbat hui hai

teri baaten karti hain hairan mujh ko

na kar apne mahbub ka zikr mujh se

na kar is tarah se pareshan mujh ko

teri miThi baaten zara si tawajjoh

nahin chahiye tera ehsan mujh ko

tujhe main ne us ki jagah rakh diya hai

mu’afi nahin dega bhagwan mujh ko

faqat apni taklif dikhti hai tujh ko

kabhi tu samajhta hai insan mujh ko

mohabbat mein ab tak mari to nahin hun

magar ab tu zinda bhi mat man mujh ko