meri talab ka ye hasil ye muddaa Thahra

mirī talab kā ye hāsil ye mudda.ā Thahrā

tire karam kā sahārā hī aasrā Thahrā

koī havā-e-zamāna use miTā na sakī

tumhārī yaad kā har naqsh der-pā Thahrā

matā.a-e-kaun-o-makāñ se azīz-tar mujh ko

jo iltifāt mire dard kī davā Thahrā

kisī ke naqd-o-nazar kā to kuchh nahīñ lekin

tirī nigāh meñ kyā jāniye maiñ kyā Thahrā

ab is ke baad jo honā hai soch lo ḳhud hī

milā huā hai jo tūfāñ se nāḳhudā Thahrā

tumhārī yaad se bach kar guzar gayā jo kabhī

vo ek lamha bhī sadiyoñ kā fāsla Thahrā

shu.ūr-e-rāh-ravī maiñ ne jis ko baḳhshā thā

ḳhushā-nasīb vahī merā rahnumā Thahrā

haqīr zarra zarā vaqt jis ke saath huā

chamak uThā to vahī vaqt kā ḳhudā Thahrā

tire hī naam kī nisbat mirā ta.āruf hai

maiñ kuchh hī kyoñ na rahā terā naqsh-e-pā Thahrā

umīd-o-bīm kā vo ma.arka bhī kyā thā 'qamar'

bas ik nazar mirī qismat kā faisla Thahrā

meri talab ka ye hasil ye muddaa Thahra

tere karam ka sahaara hi aasra Thahra

koi hawa-e-zamana use miTa na saki

tumhaari yaad ka har naqsh der-pa Thahra

mataa-e-kaun-o-makan se aziz-tar mujh ko

jo iltifat mere dard ki dawa Thahra

kisi ke naqd-o-nazar ka to kuchh nahin lekin

teri nigah mein kya jaaniye main kya Thahra

ab is ke baad jo hona hai soch lo KHud hi

mila hua hai jo tufan se naKHuda Thahra

tumhaari yaad se bach kar guzar gaya jo kabhi

wo ek lamha bhi sadiyon ka fasla Thahra

shuur-e-rah-rawi main ne jis ko baKHsha tha

KHusha-nasib wahi mera rahnuma Thahra

haqir zarra zara waqt jis ke sath hua

chamak uTha to wahi waqt ka KHuda Thahra

tere hi nam ki nisbat mera taaruf hai

main kuchh hi kyon na raha tera naqsh-e-pa Thahra

umid-o-bim ka wo marka bhi kya tha 'qamar'

bas ek nazar meri qismat ka faisla Thahra