meri tarah koi na-kaamyab ho na saka

mirī tarah koī nā-kāmyāb ho na sakā

kisī nigāh meñ bhī intiḳhāb ho na sakā

ḳhayāl-o-ḳhvāb meñ bhī kāmyāb ho na sakā

mirā ḳhayāl kabhī un kā ḳhvāb ho na sakā

chaman hazār ba-ra.anā.ī-e-bahār rahā

tumhārā husn tumhārā shabāb ho na sakā

mirī nigāh ke andāz-e-shauq jab dekhe

hijāb kar na sake vo hijāb ho na sakā

jahān-e-ishq meñ vo ham-mizāj-e-fitrat huuñ

mire ḳhilāf koī inqalāb ho na sakā

kahāñ vo ahd-e-shabāb aur talātum-e-jazbāt

sukūñ-pazīr kabhī iztirāb ho na sakā

nigāh-e-shauq se jab tak na chheḌ-chhāḌ huī

tirā shabāb mukammal shabāb ho na sakā

nigāh-e-shoḳh kī bebākiyāñ koī dekhe

ki jaise koī kabhī kāmyāb ho na sakā

harīm-e-nāz kī allāh re rif.ateñ 'bismil'

ḳhayāl meñ bhī koī bāryāb ho na sakā

meri tarah koi na-kaamyab ho na saka

kisi nigah mein bhi intiKHab ho na saka

KHayal-o-KHwab mein bhi kaamyab ho na saka

mera KHayal kabhi un ka KHwab ho na saka

chaman hazar ba-ranai-e-bahaar raha

tumhaara husn tumhaara shabab ho na saka

meri nigah ke andaz-e-shauq jab dekhe

hijab kar na sake wo hijab ho na saka

jahan-e-ishq mein wo ham-mizaj-e-fitrat hun

mere KHilaf koi inqalab ho na saka

kahan wo ahd-e-shabab aur talatum-e-jazbaat

sukun-pazir kabhi iztirab ho na saka

nigah-e-shauq se jab tak na chheD-chhaD hui

tera shabab mukammal shabab ho na saka

nigah-e-shoKH ki bebakiyan koi dekhe

ki jaise koi kabhi kaamyab ho na saka

harim-e-naz ki allah re rifaten 'bismil'

KHayal mein bhi koi baryab ho na saka