meri wafa ka na socha tha ye sila dega

mirī vafā kā na sochā thā ye sila degā

samajh ke harf-e-ġhalat vo mujhe miTā degā

bhalā vo degā bhī mujh ko to aur kyā degā

ġhamoñ kī dhuup meñ jiine kī bas sazā degā

ajiib zid hai ki ulTā hī sochtā hai vo

maiñ sach kahūñgā use jhuuT vo banā degā

sitam kā us ke kuchh andāz hī nirālā hai

jo maut chāhūñgā jiine kī vo duā degā

ye sochtā huuñ use aa.ina dikhā hī duuñ

bahut karegā bharī bazm se uThā degā

maiñ chhoḌ duuñ use 'betāb' kis tarah āḳhir

qadam qadam pe mirā ghar mujhe sadā degā

meri wafa ka na socha tha ye sila dega

samajh ke harf-e-ghalat wo mujhe miTa dega

bhala wo dega bhi mujh ko to aur kya dega

ghamon ki dhup mein jine ki bas saza dega

ajib zid hai ki ulTa hi sochta hai wo

main sach kahunga use jhuT wo bana dega

sitam ka us ke kuchh andaz hi nirala hai

jo maut chahunga jine ki wo dua dega

ye sochta hun use aaina dikha hi dun

bahut karega bhari bazm se uTha dega

main chhoD dun use 'betab' kis tarah aaKHir

qadam qadam pe mera ghar mujhe sada dega