meri zindagi ki kitab ka hai har ek waraq yun saja hua

mirī zindagī kī kitāb kā hai har ik varaq yuuñ sajā huā

kahīñ āñsuoñ se likhā huā kahīñ shoḳhiyoñ se bharā huā

mirī ārzūoñ kī titliyāñ ye masal ke kaun chalā gayā

mirī jannateñ kahāñ gum huiiñ mire ḳhvāb-zāroñ kā kyā huā

vahī rang-o-nūr kī bārisheñ vahī phuul haiñ vahī ḳhushbueñ

mire ham-safīr kahāñ ga.e mire ham-jalīsoñ kā kyā huā

kahīñ gum na ho ye rusūm meñ kahīñ kho na jaa.e hujūm meñ

ye mirī jabīn-e-niyāz par jo hai ek sajda sajā huā

tirī qurbateñ tirī chāhatīñ sabhī nafratoñ meñ badal ga.iiñ

maiñ to ibtidā se thī bevafā vo tirī vafāoñ kā kyā huā

mujhe gudgudātā hai aaj bhī tire ġhaur-o-fikr kā silsila

vo sharīr āñkheñ jhukī jhukī vo qalam laboñ meñ dabā huā

koī raushnī kī ramaq nahīñ na koī dhueñ kā nishān hai

ye diyā bhī 'sumbul' 'ajīb hai na jalā huā na bujhā huā

meri zindagi ki kitab ka hai har ek waraq yun saja hua

kahin aansuon se likha hua kahin shoKHiyon se bhara hua

meri aarzuon ki titliyan ye masal ke kaun chala gaya

meri jannaten kahan gum huin mere KHwab-zaron ka kya hua

wahi rang-o-nur ki barishen wahi phul hain wahi KHushbuen

mere ham-safir kahan gae mere ham-jalison ka kya hua

kahin gum na ho ye rusum mein kahin kho na jae hujum mein

ye meri jabin-e-niyaz par jo hai ek sajda saja hua

teri qurbaten teri chahatin sabhi nafraton mein badal gain

main to ibtida se thi bewafa wo teri wafaon ka kya hua

mujhe gudgudata hai aaj bhi tere ghaur-o-fikr ka silsila

wo sharir aankhen jhuki jhuki wo qalam labon mein daba hua

koi raushni ki ramaq nahin na koi dhuen ka nishan hai

ye diya bhi 'sumbul' 'ajib hai na jala hua na bujha hua