misal-e-barg-e-shikasta hawa ki zad par hai

misāl-e-barg-e-shikasta havā kī zad par hai

koī charāġh akelā havā kī zad par hai

amaan DhūñD rahā hai khulā huā paanī

mohabbatoñ kā jazīra havā kī zad par hai

karāhtī haiñ kisī ke firāq meñ shāmeñ

dil aisā ek shagūfa havā kī zad par hai

manā.eñ ḳhair kaho sāhiloñ se aaj kī raat

subuk-ḳhirām sā dariyā havā kī zad par hai

vafūr-e-ranj-e-tamanna se bujhtā jaatā hai

ki aaj merā hī chehra havā kī zad par hai

fazā meñ ghulne lagīñ ghanTiyoñ kī āvāzeñ

kahīñ pe koī kalīsā havā kī zad par hai

laboñ pe Duub rahī haiñ darūd kī chīḳheñ

du'ā kā band darīcha havā kī zad par hai

miTī miTī nazar aatī haiñ āyateñ yārab

aqīdatoñ kā sahīfa havā kī zad par hai

misal-e-barg-e-shikasta hawa ki zad par hai

koi charagh akela hawa ki zad par hai

aman DhunD raha hai khula hua pani

mohabbaton ka jazira hawa ki zad par hai

karahti hain kisi ke firaq mein shamen

dil aisa ek shagufa hawa ki zad par hai

manaen KHair kaho sahilon se aaj ki raat

subuk-KHiram sa dariya hawa ki zad par hai

wafur-e-ranj-e-tamanna se bujhta jata hai

ki aaj mera hi chehra hawa ki zad par hai

faza mein ghulne lagin ghanTiyon ki aawazen

kahin pe koi kalisa hawa ki zad par hai

labon pe Dub rahi hain darud ki chiKHen

du'a ka band daricha hawa ki zad par hai

miTi miTi nazar aati hain aayaten yarab

aqidaton ka sahifa hawa ki zad par hai