misal-e-mauja-e-KHusbu bikhar gae mere din

misāl-e-mauja-e-ḳhusbū bikhar ga.e mire din

guzar ga.iiñ mirī rāteñ guzar ga.e mire din

duā-e-nīm-shabī be-asar ga.ī merī

tumhāre hote hue be-samar ga.e mire din

javāb arz-o-samā se na ban paḌā koī

maiñ un se pūchh rahā thā kidhar ga.e mire din

bas ek baar mohabbat se dil huā ḳhālī

phir us ke ba.ad udāsī se bhar ga.e mire din

maiñ mubtalā-e-ġham-e-raftagāñ huā aisā

mujhe ḳhabar na hue aur mar ga.e mire din

yahī malāl mujhe sub.h-o-shām lāhaq hai

mire sabāt se kaise mukar ga.e mire din

vafūr-e-hijr hadoñ se guzar gayā thā 'na.īm'

mujhī pe dekhiye ilzām dhar ga.e mire din

misal-e-mauja-e-KHusbu bikhar gae mere din

guzar gain meri raaten guzar gae mere din

dua-e-nim-shabi be-asar gai meri

tumhaare hote hue be-samar gae mere din

jawab arz-o-sama se na ban paDa koi

main un se puchh raha tha kidhar gae mere din

bas ek bar mohabbat se dil hua KHali

phir us ke baad udasi se bhar gae mere din

main mubtala-e-gham-e-raftagan hua aisa

mujhe KHabar na hue aur mar gae mere din

yahi malal mujhe subh-o-sham lahaq hai

mere sabaat se kaise mukar gae mere din

wafur-e-hijr hadon se guzar gaya tha 'naim'

mujhi pe dekhiye ilzam dhar gae mere din