misal-e-sang paDa kab tak intizar karun

misāl-e-sañg paḌā kab tak intizār karūñ

pighalne meñ jo ravānī hai iḳhtiyār karūñ

ḳhabar nahīñ vahāñ tū kaun se libās meñ ho

maiñ kaise ālam-e-pinhāñ ko āshkār karūñ

ba-rañg-e-mauja-e-ḳhushbū uḌā uḌā phire tū

maiñ apne qurb se kyuuñ tujh ko zer-e-bār karūñ

maiñ dekhtā huuñ use kaise kaise rañgoñ meñ

kashīd-e-rañg karūñ aur baar baar karūñ

vo ek baar bhī mujh se nazar milā.e agar

to maiñ use bhī koī mehrbāñ shumār karūñ

jo tū gayā hai to maiñ bhī chalā gayā goyā

aur ab bhī dasht-e-tahayyur meñ ḳhud ko ḳhaar karūñ

yūñhī to maiñ 'zafar' is haal ko nahīñ pahuñchā

fareb de jo mujhe us pe e'tibār karūñ

misal-e-sang paDa kab tak intizar karun

pighalne mein jo rawani hai iKHtiyar karun

KHabar nahin wahan tu kaun se libas mein ho

main kaise aalam-e-pinhan ko aashkar karun

ba-rang-e-mauja-e-KHushbu uDa uDa phire tu

main apne qurb se kyun tujh ko zer-e-bar karun

main dekhta hun use kaise kaise rangon mein

kashid-e-rang karun aur bar bar karun

wo ek bar bhi mujh se nazar milae agar

to main use bhi koi mehrban shumar karun

jo tu gaya hai to main bhi chala gaya goya

aur ab bhi dasht-e-tahayyur mein KHud ko KHar karun

yunhi to main 'zafar' is haal ko nahin pahuncha

fareb de jo mujhe us pe e'tibar karun