miTa dete hain hasti ko riya-kari nahin karte

miTā dete haiñ hastī ko riyā-kārī nahīñ karte

tire bande dikhāve kī vafādārī nahīñ karte

himāla kī bulandī bhī qadam-bosī ko gar utre

zamīñ vaale zamīñ ke saath ġhaddārī nahīñ karte

hamārī tishna-kāmī ḳhud havā detī hai shiddat ko

ajab bādal haiñ pyāsoñ kī taraf-dārī nahīñ karte

banā rakhā hai kāñToñ par gharauñdā gul ne ḳhushbū kā

bilā maqsad to bhauñre nāz-bardārī nahīñ karte

jhulastī dhuup ko ham oḌh lete haiñ kabhī sar par

kabhī ham jism ke saa.e se bhī yaarī nahīñ karte

munāfiq ho agar mausam badal jaate haiñ chehre tak

ḳhushāmad karne vaale bhī taraf-dārī nahīñ karte

kashākash meñ zamāne kī basar-auqāt mushkil thī

to kyā karte agar 'najmī' adākārī nahīñ karte

miTa dete hain hasti ko riya-kari nahin karte

tere bande dikhawe ki wafadari nahin karte

himala ki bulandi bhi qadam-bosi ko gar utre

zamin wale zamin ke sath ghaddari nahin karte

hamari tishna-kaami KHud hawa deti hai shiddat ko

ajab baadal hain pyason ki taraf-dari nahin karte

bana rakha hai kanTon par gharaunda gul ne KHushbu ka

bila maqsad to bhaunre naz-bardari nahin karte

jhulasti dhup ko hum oDh lete hain kabhi sar par

kabhi hum jism ke sae se bhi yari nahin karte

munafiq ho agar mausam badal jate hain chehre tak

KHushamad karne wale bhi taraf-dari nahin karte

kashakash mein zamane ki basar-auqat mushkil thi

to kya karte agar 'najmi' adakari nahin karte