miTaen sabr dil se sabr ki talqin farmaen

miTā.eñ sabr dil se sabr kī talqīn farmā.eñ

sukūn-e-dil vahī chhīneñ vahī taskīn farmā.eñ

mohabbat meñ zabūñ-hālī kī vo taz.īn farmā.eñ

vo ġham deñ zabt-e-ġham kī daad deñ tahsīn farmā.eñ

majāz-e-‘ishq kī dushvāriyāñ shāyad haqīqī haiñ

vo sun sun kar du'ā.eñ varna kyuuñ āmīn farmā.eñ

sukūn-e-husn jaane iztirār-e-'ishq kyā shai hai

talavvun kyā hai us ko sāhib-e-tamkīn farmā.eñ

'zahīn' is meñ ḳhud un ke husn-e-kāmil kī ihānat hai

bhalā vo aur mere 'ishq kī tauhīn farmā.eñ

miTaen sabr dil se sabr ki talqin farmaen

sukun-e-dil wahi chhinen wahi taskin farmaen

mohabbat mein zabun-haali ki wo tazin farmaen

wo gham den zabt-e-gham ki dad den tahsin farmaen

majaz-e-‘ishq ki dushwariyan shayad haqiqi hain

wo sun sun kar du'aen warna kyun aamin farmaen

sukun-e-husn jaane iztirar-e-'ishq kya shai hai

talawwun kya hai us ko sahib-e-tamkin farmaen

'zahin' is mein KHud un ke husn-e-kaamil ki ihanat hai

bhala wo aur mere 'ishq ki tauhin farmaen