miTata hi raha KHud ko rulata hi raha KHud ko

miTātā hī rahā ḳhud ko rulātā hī rahā ḳhud ko

jalā kar ḳhat mohabbat ke bujhātā hī rahā ḳhud ko

chalā kar phone meñ shab bhar kahīñ jagjīt kī ġhazleñ

lagā kar kash maiñ cigarette ke jalātā hī rahā ḳhud ko

huā jo qatl ḳhvāboñ kā bahā aañsū kā jo dariyā

to phir namkīn paanī meñ Dubotā hī rahā ḳhud ko

vo shā.ir thā yā dīvāna yā koī ġham kā maarā thā

akelā shaḳhs thā aisā jo gaatā hī rahā ḳhud ko

jo TuuTā dil 'musāfir' kā to karke band kamre ko

tarannum meñ ġhazal paḌh kar sunātā hī rahā ḳhud ko

miTata hi raha KHud ko rulata hi raha KHud ko

jala kar KHat mohabbat ke bujhata hi raha KHud ko

chala kar phone mein shab bhar kahin jagjit ki ghazlen

laga kar kash main cigarette ke jalata hi raha KHud ko

hua jo qatl KHwabon ka baha aansu ka jo dariya

to phir namkin pani mein Dubota hi raha KHud ko

wo shair tha ya diwana ya koi gham ka mara tha

akela shaKHs tha aisa jo gata hi raha KHud ko

jo TuTa dil 'musafir' ka to karke band kamre ko

tarannum mein ghazal paDh kar sunata hi raha KHud ko