miTe wo dil jo tere gham ko le ke chal na sake

miTe vo dil jo tire ġham ko le ke chal na sake

vahī charāġh bujhā.e ga.e jo jal na sake

ham is liye na.ī duniyā ke saath chal na sake

ki jaise rang ye badlī hai ham badal na sake

maiñ un charāġhoñ kī umr-e-vafā ko rotā huuñ

jo ek shab bhī mire dil ke saath jal na sake

maiñ vo musāfir-e-ġhamgīñ huuñ jis ke saath 'vasīm'

ḳhizāñ ke daur bhī kuchh duur chal ke chal na sake

miTe wo dil jo tere gham ko le ke chal na sake

wahi charagh bujhae gae jo jal na sake

hum is liye nai duniya ke sath chal na sake

ki jaise rang ye badli hai hum badal na sake

main un charaghon ki umr-e-wafa ko rota hun

jo ek shab bhi mere dil ke sath jal na sake

main wo musafir-e-ghamgin hun jis ke sath 'wasim'

KHizan ke daur bhi kuchh dur chal ke chal na sake