miTTi ke lutf-o-kaif-o-asar se nikalte hum

miTTī ke lutf-o-kaif-o-asar se nikalte ham

mausam thā abr-o-bād kā ghar se nikalte ham

phir muntaqil huī hai badan se lahū kī aag

is sehr-gāh-samt-o-safar se nikalte ham

nām-o-nasab kī dhuñd meñ kho.e hue haiñ sab

mahmez karte aur bhañvar se nikalte ham

tere baġhair sub.h-o-masā kā havāla kyā

is kār-gāh shām-o-sahar se nikalte ham

tū muntaḳhab hai tujh se hai ye rañg-o-bū tamām

haañ muntashir haiñ aib-o-hunar se nikalte ham

kaisā ḳhalā hai sīnā-e-insāñ meñ ḳhema-zan

is māvarā-e-naqd-o-nazar se nikalte ham

jaulāñgah-e-nashāt bhī thī ġham bhī the 'ḳhumār'

dīvār-o-dar se shāḳh-o-shajar se nikalte ham

miTTi ke lutf-o-kaif-o-asar se nikalte hum

mausam tha abr-o-baad ka ghar se nikalte hum

phir muntaqil hui hai badan se lahu ki aag

is sehr-gah-samt-o-safar se nikalte hum

nam-o-nasab ki dhund mein khoe hue hain sab

mahmez karte aur bhanwar se nikalte hum

tere baghair subh-o-masa ka hawala kya

is kar-gah sham-o-sahar se nikalte hum

tu muntaKHab hai tujh se hai ye rang-o-bu tamam

han muntashir hain aib-o-hunar se nikalte hum

kaisa KHala hai sina-e-insan mein KHema-zan

is mawara-e-naqd-o-nazar se nikalte hum

jaulangah-e-nashat bhi thi gham bhi the 'KHumar'

diwar-o-dar se shaKH-o-shajar se nikalte hum