mizaj humse ziyaada juda na tha us ka

mizāj ham se ziyāda judā na thā us kā

jab apne taur yahī the to kyā gila us kā

vo apne zo.am meñ thā be-ḳhabar rahā mujh se

use gumāñ bhī nahīñ maiñ nahīñ rahā us kā

vo barq-rau thā magar vo gayā kahāñ jaane

ab intizār kareñge shikasta-pā us kā

chalo ye sail-e-balā-ḳhez hī bane apnā

safīna us kā ḳhudā us kā nāḳhudā us kā

ye ahl-e-dard bhī kis kī duhā.ī dete haiñ

vo chup bhī ho to zamāna hai ham-navā us kā

hamīñ ne tark-e-ta.alluq meñ pahl kī ki 'farāz'

vo chāhtā thā magar hausla na thā us kā

mizaj hum se ziyaada juda na tha us ka

jab apne taur yahi the to kya gila us ka

wo apne zoam mein tha be-KHabar raha mujh se

use guman bhi nahin main nahin raha us ka

wo barq-rau tha magar wo gaya kahan jaane

ab intizar karenge shikasta-pa us ka

chalo ye sail-e-bala-KHez hi bane apna

safina us ka KHuda us ka naKHuda us ka

ye ahl-e-dard bhi kis ki duhai dete hain

wo chup bhi ho to zamana hai ham-nawa us ka

hamin ne tark-e-talluq mein pahl ki ki 'faraaz'

wo chahta tha magar hausla na tha us ka